හිටපු අමාත්‍ය කෙහෙළිය රඹුක්වැල්ල මහතා පාර්ලිමේන්තු වරප්‍රසාද අවභාවිතාවට ලක් කර ඇතැයි නීතිපතිවරයා ගෙන් චෝදනා එල්ල වී තිබෙනවා.
ප්‍රමිතියෙන් තොර ප්‍රතිදේහ එන්නත් මිලදී ගැනීමේ සිද්ධිය සම්බන්ධයෙන් තමන්ව නඩු විභාගය අවසන් වන තුරු රක්ෂිත බන්ධනාගාර ගත කිරීමට මාලිගාකන්ද මහේස්ත්‍රාත් අධිකරණය දී ඇති නියෝගය බලශුන්‍ය කිරීමේ තීන්දුවක් ලබාදෙන ලෙස ඉල්ලා ගොනුකර තිබෙන රිට් පෙත්සමේ අන්තර්ගත දිවුරුම් ප්‍රකාශවලට හිටපු සෞඛ්‍ය අමාත්‍ය කෙහෙළිය රඹුක්වැල්ල මහතා අත්සන් කර තිබෙන්නේ පාර්ලිමේන්තුවේදී රැස්වීම්වලට සහභාගී වන අතරතුර බවත් එම ක්‍රියාව තුළින් හිටපු අමාත්‍යවරයා පාර්ලිමේන්තු වරප්‍රසාද අවභාවිතාවට ලක් කර තිබෙන බවත් නීතිපතිවරයා ඊයේ(27) අභියාචනාධිකරණය හමුවේ ප්‍රකාශ කළා.
තමන්ට එරෙහිව මාළිගාකන්ද මහේස්ත්‍රාත් අධිකරණය විසින් දී ඇති නියෝගය අභියෝගයට ලක් කරමින් හිටපු සෞඛ්‍ය අමාත්‍ය කෙහෙළිය රඹුක්වැල්ල මහතා විසින් ඉදිරිපත් කළ රිට් පෙත්සම ඊයේ යළි සලකා බැලූ අවස්ථාවේදී නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජෙනරාල් නිර්මලන් විග්නේෂ්වරන් මහතා මේ බව සඳහන් කළා.
මෙම පෙත්සම ඊයේ අභියාචනාධිකරණ විනිසුරු නිශ්ශංක බන්දුල කරුණාරත්න සහ ශෂී මහේන්ද්‍රන් යන මහත්වරුන්ගේ සමන්විත විනිසුරු මඩුල්ලක් ඉදිරියේ සලකා බැලු බව සදහන්.
එහිදී නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් නිර්මලන් විග්නේෂ්වරන් මහතා අධිකරණය හමුවේ කරුණු දක්වමින් මෙම පෙත්සම පවත්වාගෙන යාමට නොහැකි බව සඳහන් කරමින් විරෝධතා ඉදිරිපත් කළා.
ඖෂධ හිඟයක් රට තුළ පවතින බවට අමාත්‍ය මණ්ඩල පත්‍රිකාවක් ඉදිරිපත් කරමින් අමාත්‍ය මණ්ඩලය නොමග යවා ප්‍රශ්නගත ඖෂධ මිලදී ගැනීමට පෙත්සම්කරු විසින් කටයුතු කර ඇති බවත් සෞඛ්‍ය අමාත්‍යාංශයේ ප්‍රධානියා වශයෙන් එම අමාත්‍යාංශය ගනු ලැබූ සියලු තීන්දු තීරණවලට වගකීමට පෙත්සම්කරු බැඳී සිටින බවත් ඔහු කියා සිටියා.
අපරාධ පරීක්ෂණ දෙපාර්තමේන්තුව විසින් තමන්ව අත්අඩංගුවට ගැනීමට එරෙහිව කෙහෙළිය රඹුක්වැල්ල මහතා මේ වන විට ශ්‍රේෂ්ඨාධිකරණය හමුවේ මූලික අයිතිවාසිකම් පෙත්සමක් ගොනුකර ඇති බවත් එසේ ඉහළ අධිකරණයක නඩුකරයක් ගොනුකර තිබියදී ඒ හා සමාන නඩුකරයක් අභියාචනාධිකරණය හමුවේ ගොනු කිරීම තුළින් ඔහු අධිකරණ ක්‍රියාදාමය අවභාවිතාවට ලක් කර තිබෙන බවත් නියෝජ්‍ය සොලිසිටර් ජෙනරාල්වරයා චෝදනා කළා.
මෙම නඩුකරයට අදාළ දිවුරුම් ප්‍රකාශ වලට කෙහෙලිය රඹුක්වැල්ල මහතා අත්සන් කර තිබෙන්නේ පාර්ලිමේන්තු රැස්වීම් සඳහා සහභාගී වී සිටි අතරතුර යැයි පෙන්වා දුන් නියෝජ්‍ය සොලිසිටර් ජෙනරාල්වරයා එය සම්පූර්ණයෙන්ම පාර්ලිමේන්තු වරප්‍රසාද අවභාවිතාවට ලක් කිරීමක් බවත් චෝදනා කර සිටියා.
බන්ධනාගාරගතව සිටින සැකකරුවෙවෙ දිවුරුම් පෙත්සම්වලට අත්සන් කිරීම සිදුකළ යුත්තේ බන්ධනාගාර නිලධාරීවරයෙකු ඉදිරිපිට වුවත් පෙත්සම්කරු එම නීතිමය ක්‍රියා පටිපාටියට පරිබාහිරව පාර්ලිමේන්තු රැස්වීම් වලට සහභාගි වූ අතරතුර එම දිවුරුම් ප්‍රකාශ වලට අත්සන් කිරීම හරහා ඔහු බන්ධනාගාර පනත යටතේ වරදක් සිදුකර ඇති බවත් නියෝජ්‍ය සොලිස්ටර් ජෙනරාල්වරයා අධිකරණය හමුවේ කරුණු දක්වා සිටියා.
පෙත්සම්කාර හිටපු අමාත්‍යවරයා රිමාන්ඩ් භාරයට පත් කළ දා සිට බන්ධනාගාර රෝහලට ඇතුළත්ව සිටින බවත් ඔහුට බන්ධනාගාර රෝහලේදී එම දිවුරුම් ප්‍රකාශවලට අත්සන් කිරීමට ඕනෑ තරම් අවස්ථාව තිබූ බවත් ඔහු සඳහන් කළා.
එම අවස්ථාවේදී විනිසුරු ශෂී මහේන්ද්‍රන් මහතා විවෘත අධිකරණයේ ප්‍රකාශ කළේ දේශපාලඥයෙකු රක්ෂිත බන්ධනාගාර ගත කළ සෑම අවස්ථාවකම ඔහු බන්ධනාගාර රෝහලට ඇතුළත් වීම දක්නට ලැබෙන බවත් මෙවැනි ක්‍රියා තුළින් අධිකරණය සහ බන්ධනාගාරය කෙරෙහි පවතින මහජන විශ්වාසය කඩවීමක් සිදුවන බවයි.
මෙවැනි ක්‍රියා මහජනතාවගේ උදහසට මෙන්ම හාස්‍යයට ලක් වී තිබෙන බවත් විනිසුරුවරයා වැඩිදුරටත් සඳහන් කළා.
ඉන් අනතුරුව වැඩිදුර පෙත්සම සලකා බැලීම ලබන 01 වනදා දක්වා කල් දමා තිබෙනවා.