ශ්‍රී ලංකාව හා එංගලන්තය අතර ලෝඩ්ස් ක්‍රීඩාංගණයේ පැවැත්වෙන දෙවන ටෙස්ට් ක්‍රිකට් තරගයේ දෙවන දිනට ඊයේ (30) තරගය නතර කරන සිට තම දෙවන ඉනිම ක්‍රීඩා කරමින් සිටි එංගලන්ත කණ්ඩායම එක් කඩුල්ලක් දැවී ලකුණු 25ක් රැස්කරගෙන සිටියා.

ඒ අනුව ඔවුන් මේ වනවිට ශ්‍රී ලංකාවට වඩා ලකුණු 256ක දැවැන්ත ඉදිරියකින් සිටිනවා.

එංගලන්ත දෙවන ඉනිම වෙනුවෙන් බෙන් ඩකට් නොදැවී ලකුණු 15ක් හා නායක ඔලී පොප් ලකුණු 02ක් රැස්කරගෙන සිටියා.

බිඳවැටුණු එකම කඩුල්ල වූ ඩෑන් ලෝරන්ස් ලකුණු 07ක් රැස්කරගෙන සිටියදී දවාගැනීමට ලහිරු කුමාර සමත් වුණා.

මෙම තරගයේ පළමුව පන්දුවට පහරදුන් එංගලන්ත කණ්ඩායම සිය පළමු ඉනිමට සියලු දෙනා දැවී ලකුණු 427ක් රැස්කළ අතර, ඊට පිළිතුරු ලෙස ශ්‍රී ලංකාව සිය පළමු ඉනිමට රැස්කළේ සියලු දෙනා දැවී ලකුණු 196ක් පමණයි.

ඒ හේතුවෙන් ලකුණු 231ක් ඉදිරියෙන් සිටිමින් දෙවන ඉනිම ඇරඹීමට එංගලන්ත කණ්ඩායමට අවස්ථාව උදාවුණා.

අද (31) තරගයේ තෙවැනි දිනයයි